Leigunevndin   >   Faroese Edition   >   Lógin   >   Upplýsing til leigara

    Upplýsing til leigara

    Sum leigari hevur tú  rættindi í leigulógini.

    Talan er fyrst og fremst um uppsagnarrættindi, og verju móti órímiligum broytingum í leigutíðarskeiðnum.

    Eisini hevur tú rætt til at kæra til leigunevndina.

    Niðanfyri eru nakrir spurningar svaraðir (oss/faq). Talan er ikki um úttømandi spurningar og svar, men skal skiljast sum ein vegleiðing. Mælt verður til, at leigari setur seg væl inn í viðurskiftini, lesur lógina og tryggjar, at leigusáttmáli, innflytingarfrágreiðing og deponeringsavtala verða gjørd á fullfíggjaðan hátt.

     

    OSS:

    Hvat kann eg kæra um?

    Kærast kann t.d. um: 

    • leigugjaldið
    • hækking av leigugjaldinum
    • almennu reglurnar um krøv til bústað (§ 9)
    • manglandi ábøtur (útleigari skal hava atgongd til leigumálið, so ábøtur og viðlíkahald  kunnu gerast, §§ 9 og 10)
    • grundarlagið fyri uppsøgn av leigumálinum
    • um leigarin metir seg vera uppsagdan av órøttum (bert galdandi fyri vinnulig leigumál)
    • depositum.

    Hvussu geri eg tá ið eg skal kæra?

    • Kæran skal sendast leigunevndini skrivliga á t-post: leigunevndin@leigunevndin.fo

    Hvørjir upplýsingar/skjøl skulu sendast við tá kært verður

    • leigusáttmálin og innflytingarfrágreiðingin
    • deponeringsavtalan (serliga tá kært verður um depositum)
    • skrivligt samskifti millum partarnar, myndir osv.

    Er útleigari vinnuligur ella ikki vinnuligur ?

    • Um útleigari hevur fleiri enn tvey leigumál er talan um vinnuligt leigumál
    • Løgfrøðiligur persónur (t.d. P/f) er eisini at rokna sum vinnuligur útleigari, óansæð tal av leigumálum.

    Hvussu long er mín uppsagnarfreist?

    • 1 mánað. 

    Nær á mánaðinum skal eg siga upp?

    • leigarin skal siga upp við 1 mánaða freist til endan av einum mánaði
    • dømi 1: leigarin gevur útleigara uppsøgnina skrivlig 30 mai. Leigarin skal tá vera úti av leigumálinum í seinasta lagi 30. juni og leiga skal gjaldast fyri allan juni mánað. 
    • dømi 2: leigarin gevur útleigara uppsøgnina skrivliga 1. juni. Leigarin er tá leysur av leigumálinum 31. juli. Leiga skal sostatt rindast fyri juni og juli mánað.

    Hvussu sigi eg upp?

    • leigumálið verður sagt upp skrivliga við dagfesting.

    Hvussu geri eg útleigara vart við mishald?

    • sum skjótast skrivliga við dagfesting.

    Grein 26, stk. 1, nr. 1-7 ásetir neyvari hvat kærast kann um.